2025-09-19A
A. “MY SEUN”
Spr 2:1 My seun, as jy my woorde aanneem en my gebooie by jou bewaar, …
Dit is duidelik die Hemelse Vader wat deur Salomo tot sy aardse seuns spreek. “My seun” sluit ook in elkeen wat na die vlees vroulik is (Sien studiegids 2) net soos wat die ganse Skrif op beide geslagte van toepassing is, behalwe waar duidelik anders aangedui. Ons let opdie volgende tekse:
Gen 1:26 En God het gesê: Laat Ons mense maak na ons beeld, na ons gelykenis, en laat hulle heers … . 1:27 En God het die mens geskape na sy beeld; na die beeld van God het Hy hom geskape; man en vrou het Hy hulle geskape. 2:22 En die HERE God bou die rib wat Hy van die mens geneem het, tot ‘n vrou en bring haar na die mens. 23 Toe sê die mens: Dit is nou eindelik been van my gebeente en vlees van my vlees. Sy sal mannin genoem word, want sy is uit die man geneem. 5:1 … Die dag toe God Adam geskape het, het Hy hom gemaak na die gelykenis van God. 2 Man en vrou het Hy hulle geskape en hulle geseën en hulle mens genoem, die dag toe hulle geskape is.
Uit hierdie tekse is dit duidelik dat die man en vrou, man en mannin saam, as mens, die Here God uitbeeld.
Die Heer het Eva nie afsonderlik uit die stof van die aarde geskape nie maar uit Adam se ribbebeen geformeer. Hierdie skeiding van die mens tot twee wesens is tydelik sodat die mens, mense kan voortbring. In die hiernamaals sal die mens nie meer in twee geslagte verdeel wees nie; so het Jesus self gesê:
Luk 20:35 maar die wat waardig geag word om daardie eeu en die opstanding uit die dode te verkry, trou nie en word nie in die huwelik uitgegee nie. 36 Want hulle kan ook nie meer sterwe nie, want hulle is soos die engele en is kinders van God, omdat hulle kinders van die opstanding is.
Gal 3:26 Want julle is almal kinders van God deur die geloof in Christus Jesus; 27 want julle almal wat in Christus gedoop is, het julle met Christus beklee. 28 Daar is nie meer Jood of Griek nie, daar is nie meer slaaf of vryman nie, daar is nie meer man en vrou nie; want julle is almal een in Christus Jesus.
Moontlik kan ons, na aanleiding van die voorafgaande teks, verder gaan en sê dat die kinders van God (wedergeborenes) nou reeds geestelik geslagloos is; dat hul gees geslagloos is. Die wedergebore mens word die Bruid van Christus soos wat Salomo dit in sy Hooglied so treffend uitbeeld. Wanneer ons daar Bo kom sal ons dit beter verstaan.
Waarom maak ons so veel hiervan? Sodat elke suster in Christus nie uitgesluit moet voel nie maar verseker moet weet dat elke keer wanneer die Heer deur Salomo met “my seun” praat, sy net so veel as haar broer in Christus aangespreek word en ingesluit is.
B. DIE INTENSE SOEKE NA WYSHEID
Spr 2:1 My seun, …
… as jy my woorde aanneem en my gebooie by jou bewaar, 2 sodat jy jou oor laat luister na wysheid, jou hart neig tot verstand; 3 ja, as jy na die insig roep, na die verstand jou stem verhef, 4 as jy daarna soek soos na silwer en dit naspeur soos verborge skatte, 5 dan sal … (Beklemtoning deur die skrywer aangebring).
“As jy”: Om goddelike, hemelse, wysheid te bekom moet jy as ‘n “seun van Salomo” ten minste die volgende drie vereistes nakom:
- Jou geestelike oor spits en aandagtig luister na wat God jou gebied om te doen of nie te doen nie, dit weer en weer oordink om seker te maak dat jy verstaan wat Hy bedoel, jou hart daarop sit om dit na te kom en dit wat jy op hierdie wyse bekom het in jou geheue wegbêre en herhaaldelik weer en weer gaan uithaal en oordink om te verseker dat jy dit nie weer met verloop van tyd verloor (vergeet) nie.
- … Jy moet in geloof hard uitroep tot insig soos wat jy sou doen om ‘n haastige verbygaande persoon se aandag te trek en hom te laat afdraai na jou toe om eers jou dringende vraag te beantwoord voordat hy verder gaan. Jy dink jy verstaan hoe God dink maar sy insig in ‘n saak is dikwels gans anders as wat die mens dit sien.
- … Jy moet hierdie goddelike wysheid beskou as silwer of ander kosbare skatte (juwele), die waarde waarvan vir die gewone mens weens onkunde verborge, maar vir jou wat reeds iets daarvan bekom het, uiters hoog is, so kosbaar dat jy oortuig is dat dit jou onbeskryflik sal verryk. Dink aan ‘n ongeslypte diamant: vir die leek is dit maar net nog ‘n klippie in die sand maar, die diamant handelaar is dit’n steen waarvoor hy al sy besittings sal gee.
C. WAT GOD VIR JOU SAL GEE EN SAL DOEN
As jy jou soos voormeld sou beywer om goddelike wysheid te bekom, sal die volgende jou te beurt val:
- Jy sal die vrees van die HERE verstaan en die kennis van God vind (2:5). Jy sal die geestelike kennis, begrip en vermoë verkry om met die wyse God te kan wandel.
- Hy sal deur sy Gees tot jou woorde van wysheid spreek: 2:6: (want die HERE gee wysheid, uit sy mond kom kennis en verstand,: Hy sal jou ernstige soeke beloon en uit sy ryke oorvloed mildelik toevoeg tot jou wysheid, kennis en vermoë om te doen wat reg is. Hiervan kon Salomo uit eie ondervinding getuig. Toe hy God om wysheid gevra het om sy volk verstandig te kon regeer en hul hofsake regverdig te kon bereg, het die Heer dit vir hom in oorvloed gegee sodat volke wêreldwyd daarvan te hore gekom en daaroor verstom was. Die Here belowe dit ook aan ons in Jak 1:5: En as iemand van julle wysheid kortkom, laat hom dit van God bid, wat aan almal eenvoudig gee sonder om te verwyt, en dit sal aan hom gegee word.
- Hy sal jou help en bystaan waar jy dit ookal nodig het (2:7). Sal Hy vir jou ‘n skild wees teen die vurige pyle van haat en beskindering wat die duiwel deur sy bose krygers op jou afvuur.
- Hy sal die paaie van wat reg is, waarop jy wandel, bewaak (2:8), patrolleer (soos wat sy skare van engele Jakob en sy mense vergesel het toe hulle sy broer Esau tegemoet getrek het.) omdat jy, net soos hy, een van God se gunstelinge is.
- Wanneer jy herhaaldelik sien hoe dat die besluite wat jy deur sy wysheid neem sake vir jou reg laat uitwerk, sal jy al meer leer wat die regte pad is om te kies (2:9): … dan sal jy geregtigheid en reg verstaan en regverdigheid—elke goeie pad.
- Dan sal die wysheid van God vir jou lieflik word (2:10) en sal jy jou met vreugde aan sy oorleg en verstandige beplanning oorgee om jou lewensweg vir jou uit te werk: … Want wysheid sal in jou hart kom, en kennis vir jou siel lieflik wees;
D. PERSONE TEEN WIE DIE HERE JOU SAL BESKERM
- Hulle wat inherent sleg en vals is deurdat hulle voorgee om te wees wie hulle nie werklik is nie en belowe om te doen wat hulle gladnie in gedagte het nie (2:12).
- Hulle wat soveel het om weg te steek dat hulle nie kan waag om op die verligte paaie te wandel nie maar met die donker stegies langs sluip (2:13).
- Hulle wat nie net self kwaad doen nie maar ook skaterlag wanneer hulle hoor van hul makkers se bose streke en hoe dié daarmee weggekom en die gereg ontduik het (2:14).
- Hulle wat nie in die spore van geregtigheid wandel nie maar langsaan trap sodat hulle darem ‘n skyn van geregtigheid en vroomheid kan handhaaf terwyl hulle inderdaad die weg van die verlorenes bewandel (2:15).
- Hulle wat op seksuele gebied in die duister wandel en in Spreuke as die vreemde, ontugtige of vrou dwaasheid bekend staan, van wie daar vele wariasies is. Hier word verwys na ‘n getroude vrou wat verveeld geraak het met haar huweliksmaat en nou ander afleiding soek. Sy is losbandig en vlei haar prooi (die man) om hom sag te maak. Sy vertel hom hoe dat hy haar beïndruk en wat ‘n wonderlike persoon hy is. So wen sy, sy vertroue. Verder stort sy trane oor haar eggenoot wat koud en afsydig teenoor haar is terwyl sy smag na ‘n bietjie liefde, ‘n bietjie warmte (2:17). So wen sy, sy simpatie. Hy verloor sy waaksaamheid, probeer haar troos deur haar net vir ‘n oomblik sydelings teen hom vas te druk. Net daar kry sy hom in haar betowerende mag. Wat gebeur? Sy vernietig eerstens haar eie huis, laat dit wegsink in die dood, in die bose skimmeryk wat uitloop op die ewige dood en sleep ook haar verowerde prooi met haar saam.
- Maar hierdie vers is natuurlik net so van toepassing op ‘n getroude vrou wat ‘n man ten prooi val. In haar werk situasie staan sy miskien onder die gesag van ‘n ouer, aantreklike man wat geoefend is om jag te maak op die skonere geslag, veral hulle wat nog jonk en sprankelend is. Hy vlei haar en neem haar uit vir ete wanneer hulle saam na buiteposte moet reis. Sy probeer haar bes om hom tevrede te stel in die werk wat sy moet doen en hy buit dit uit. So word ‘n onsigbare band geleidelik gesmee. Sy sien dit as ‘n onvermydelike, onskuldige, “skelmpie” verhouding. Ook hy is besig om sy huwelik te vernietig en haar saam in die kuil van duisternis in te sleep.
E. HOE DIE BEOEFENING VAN DIE WYSHEID VAN GOD JOU SAL BESKERM
2:20 sodat jy kan wandel op die weg van die goeies en die paaie van die regverdiges kan hou;
Omdat jy gedurigdeur fokus op die wyse weg van die goeies, die weë van die regverdiges, sal Hy, die Vader van die wysheid, jou ‘n wyse weg aanwys om uit die vangnet van al hierdie boosdoeners te ontsnap. So het hy vir die skrywer van hierdie studiegids gedoen:
Ek was eenmaal opgedra om ‘n sekere stelsel binne ‘n organisasie te ondersoek en aanbevelings te doen oor hoe dit verbeter kon word. Die ondersoek het lank geduur en ek was deurentyd met ‘n hele aantal dames in kontak van wie ek inligting moes inwin. Na ‘n aantal weke neem die hoofdame my eenkant toe en vra, half gesteurd, of ek dan nog nie gesien het dat sy smoor verlief op my is en net nie kans sien om langer sonder my te lewe nie. Ek was behoorlik uit die veld geslaan want ek was so ingestel op die taak wat aan my opgedra was, dat ek algeheel nie vatbaar was vir ‘n romanse nie. Bowendien was ek heerlik gelukkig getroud.
Dit was nou ‘n tameletjie want dié dame was ‘n sleutelpersoon in my projek en sou ek haar die afjak gee wat sy toegekom het en sy aanstoot neem, wat sekerlik sou gebeur (“there is no fury like that of a woman scorned”) kon sy my aanbevelings kelder en selfs my loopbaan benadeel. Ek het vinnig gedink, ‘n antwoord van Bo ontvang, na vore getree, haar met groot deernis in die oë gekyk en geantwoord: “Ai, ou Madelyn (skuilnaam) ek is sooo jammer om hiervan te hoor. Ek het dit nooit besef nie. Dit moet vreeslik wees om in so ‘n trauma te beland. Sodra ek vanaand tuiskom, sal ek dit met my vroutjie deel en sal ons die Heer bid om jou hiervan te verlos”. Sy het my verstom aangestaar, omgedraai en regop-rug weggetrippel. Dit was die laaste keer dat sy haar hartsake met my gedeel het en ek kon voortgaan met my taak asof niks gebeur het nie en dit met haar samewerking suksesvol afhandel. (Ek het die insident toe ook die aand met vroulief gedeel (want ons wandel in die lig met mekaar) waarna ons rustig saam vir die dame gebid en daarvan vergeet het.
‘n Ander wyse Spreuk lui:
15:1 ‘n Sagte antwoord keer die grimmigheid af, maar ‘n krenkende woord laat die toorn opkom.
F. BELOFTES AAN HULLE WAT IN WYSHEID WANDEL
2:21 want die opregtes sal die land bewoon, en die regskapenes daarin oorbly,
2:22 maar die goddelose sal uit die land uitgeroei, en die ontroues sal daaruit weggeruk word.
Die wêreld waarin ons leef en beweeg word dikwels deur dwase besluite en optredes gekelder en die wyse ly saam met die goddeloses daaronder, maar wat ‘n wonderlike vooruitsig dat die dwases eendag weggeruk sal word want die wyses is reeds benoem as die alleen erfgename van die nuwe skepping. Halleluja.
//////////
NA INDEKS ~~~~~~~~~~~~~~~~~~~~~~~~~~~~~~~~~~~~~~~~~ NA VOLGENDE STUDIEGIDS