2024-07-06
A. DIE SWAKKES EN DIE STERKES (14:1-15:13).
Hoofstuk 14 en die eerste gedeelte van hoofstuk 15 handel oor diegene in elke gemeente wat meer onlangs na Christus gekom het en nog swak is in geloof, teenoor hulle wat die Heer lank reeds geken en geestelik al heelwat ontwikkel en sterk geword het. Daar was ook die wat uit ‘n Joodse agtergrond gekom en andere wat hul wortels in die heidendom gehad het. Die gevolg van hierdie verskille was dat lidmate dit nie altyd eens was oor hoe hulle hulself op sekere gebiede van die Christelike moes uitleef nie.
Die probleem het nie fundamentele gedragskodes geraak nie, kom ons sê morele kwessies soos dronk word, owerspel pleeg of moord nie. Almal sou saamstem dat hierdie dinge in die oë van God sondig was en vermy moes word. Daar was egter grys areas as gevolg van mense se uiteenlopende agtergronde waaroor hulle verskillende sienings kon hê. ‘n Jood wat pas tot Christus bekeer was, sou dalk nog steeds die Joodse heilige feesdae tot eer van God wou hou, alhoewel hy sou verstaan dat hy nie daarmee God se guns om in die hemel te kom, kon koop nie. Daarenteen sou lidmate wat uit ‘n heidense agtergrond gekom en nooit enige deel aan sulke dae gehad het nie, hoegenaamd geen verpligting of voordeel daarin kon sien om dit na te kom nie; vir hulle sou dit net ‘n las wees.
Nog ‘n area van moontlike verskil en konflik, was in wat om te eet en wat nie. Die Joodse wette was baie streng om sekere diere wat as onrein beskou is, nie te eet nie. Om dit te eet, so is hulle geleer, sou daartoe lei dat jy geestelik onrein word voor God. ‘n Jood wat pas tot Christus bekeer was, sou dit dus afskuwelik vind om die vleis van ‘n vark, perd, hond of slang te eet. Christene uit ‘n heidense agtergrond weer, sou geen sodanige gewetensbesware hê nie en vry voel om te eet wat God ook al geskape het.
‘n Derde area van konflik sou wees om vleis te eet wat aan afgode geoffer was. Beide Joodse en nie-Joodse Christene mag gevoel het dat hulle God se toorn opwek deur dit te doen. Die meer volwasse Christen sou egter so diep oortuig wees dat daar net een God is en hoegenaamd geen ander gode nie, dat hy enige vorm van afgod totaal en al sou ignoreer. Hy sou hom nie steur aan die offer van vleis aan sogenaamde afgode nie en sou dus vryelik enige vleis eet wat op die tafel voorgesit word, sonder enige gewetenswroeging. Deesdae kan ons miskien ‘n parallel vind in “Halal”-kosse wat in ons winkels verkoop word, dit wil sê voedsel wat volgens die voorskrifte van die Moslem-geloof verwerk is.
Paulus gee twee riglyne vir die hantering van hierdie moontlike konflikte in gemeentes. Eerstens moes lidmate begrip daarvoor hê dat hierdie grys areas is waarin elke lidmaat volgens sy eie gewete moes optree. Dit was ‘n saak tussen ‘n gelowige en sy Meester, Christus. Hedendaags is dit soos wanneer iemand nie verstaan waarom ‘n werknemer sy werkgewer op ‘n sekere manier dien nie. Dit mag vir hom vreemd of onaanvaarbaar voorkom, maar hy meng nie in nie omdat hy besef dat dit per slot van rekening ‘n saak tussen daardie dienskneg en sy heer is waarin hy as buitestander nie ‘n sê het nie.
Wat homself egter betref, moet ‘n Christen nooit iets doen waaroor hy twyfel of dit voor God reg is of nie. In so ‘n geval is die punt nie of soseer of dit reg of verkeerd is nie, maar dat hy voortgaan om iets te doen waaroor hy geen sekerheid het dat dit reg is nie. Hy minag Christus, sy Heer, deur so ‘n kans te vat.
Aangesien die Skrif op sekere gebiede geen duidelike rigting gee oor wat reg of verkeerd is nie, maar die besluit aan elke individuele persoon oorlaat, moet Christene mekaar nie veroordeel as hulle verskillende standpunte daaroor huldig nie.
Die derde riglyn wat lidmate moet toepas, is dat hulle altyd in liefde moet optree en nie hul vryheid moet beoefen op ‘n wyse wat ‘n swakker Christen kan laat struikel en val nie. In ‘n gemeenskap van Christene wat steeds baie sensitief is oor die eet van vleis wat aan afgode geoffer is, kan dit verkeerd wees vir ‘n Christenleier, wat ‘n diep begrip het van die vryheid wat Christus hom bied, om sy vryheid uit te oefen deur sulke vleis te eet. Hy skep daardeur dalk die indruk dat daar geen kwaad in is om die wil van God in sekere areas van jou lewe maar te systap of af te water nie. Dit kan veroorsaak dat swakker Christene onverskillig raak in hul wandel met God, wat die duiwel die geleentheid bied om hulle te verlei en te laat struikel. So kan hul lewenswandel al meer deur sonde besoedel word en kan hulle mettertyd algeheel van die Here Jesus af wegdwaal. Die persoon wat hulle laat struikel het, het dus nie in liefde opgetree nie.
Daarom, in areas waarin die Skrif duidelik is, moet ons streng daarvolgens handel; in grys areas, moet ons buigsaam wees; op alle gebiede moet ons mekaar in liefde dien (doen wat vir mekaar die beste is).
Verse 17 en 18 is hierin besonder belangrik:
Want die koninkryk van God is nie spys en drank nie, maar geregtigheid en vrede en blydskap in die Heilige Gees. Want hy wat Christus hierin dien, is aan God welgevallig en by die mense geag.
Die Wet van Moses het groot klem geplaas op wat om nie te eet of aan te raak nie, maar daardie reëls was bedoel as voorbeelde van geestelike waarhede; hulle het die mens laat besef dat hy God moes vra watter gedrag vir Hom aanvaarbaar is en wat nie. Die Here Jesus het hierdie reëls herinterpreteer en daarop gewys dat ons nie besoedel word deur die materiële dinge wat van buite ingeneem word, soos kos en drank nie, maar deur dit wat uit ons harte uitgaan, uit ons binneste: woorde en dade wat sy Naam in oneer bring (Matt 15:11,18). Daarom sluit Paulus ook hierdie Skrifgedeelte af met die volgende woorde (15:13) waarin hy die positiewe dinge wat ons moet kweek, uitlig:
En mag die God van die hoop julle vervul met alle blydskap en vrede deur die geloof, dat julle oorvloedig kan wees in die hoop deur die krag van die Heilige Gees!
B. PAULUS SE TOEKOMSPLANNE EN GROETE (15:23- 16:27).
Ter afsluiting van sy brief aan die gemeente in Rome, sit Paulus sy planne vir die toekoms uiteen, naamlik dat hy van voorneme was om eers af te gaan na Jerusalem om die fondse wat deur sekere gemeentes bygedra was, aan die gemeente aldaar te besorg. Daarna wou hy die Evangelie na Spanje neem. Op pad soontoe, so was sy voorneme, sou hy by hulle gemeente in Rome aandoen om ‘n geestelike seën aan hulle oor te dra. (Dit sou sekerlik wees deur die openbaarmaking van die verborgenhede van die gedagtes van God waarin hy soveel insae gehad het.) Maar vireers sou hy te staan kom voor die weerstand van die ongelowige Jode in Judea tydens sy komende besoek. Dit het die Heer vooraf reeds by wyse van profesië aan hom geopenbaar. Daarom versoek hy die lesers van sy brief om vir hom te bid.
Daarna dra hy groete oor aan ‘n hele aantal mense en noem ten minste 26 van hulle by die naam. Dit is persone met wie hy in die loop van sy bediening saamgewerk en wat later na Rome verhuis het. (Dit wys net watter groot belangstelling en liefde hy gehad het vir elkeen wat die Here oor sy pad gebring het. Elkeen was vir hom kosbaar. Dit was nie ‘n geval van, “Uit die oog ,uit die hart nie,” nee, hy het almal nog by name onthou en sekerlik ook vir hulle gebid.)
Soos in verskeie van sy ander briewe, waarsku hy teen selfgesentreerde lidmate wat die duidelike Woord van God vir hulle eie voordeel verdraai. Dit lei andere op ‘n dwaalspoor en bring verdeeldheid in die gemeente.
Wat satan betref, was hy vol vertroue dat die God van vrede hom binnekort onder hulle voete sou verpletter.
Hy dra ook die groete van ‘n aantal van sy medewerkers oor aan die gemeente in Rome.
Daarna sluit hy sy brief af met ‘n doksologie (lofprysing) aan die alleenwyse God en bring aan Hom heerlikheid deur Jesus Christus – tot in ewigheid!
//////////
KOMMENTAAR
ONS ONTVANG GRAAG U EVALUERING VAN DIE STUDIEGIDS, ASOOK ENIGE ANDER OPMERKING OF VERSOEK DEUR MIDDEL VAN DIE KONTAKVORM WAT HIERONDER VOORSIEN WORD.
AFLAAI
BO-AAN DIE BLAD IS VOORSIENING GEMAAK VIR DIE AFLAAI VAN DIE GIDS.
AANSTUUR
HEELONDER IS SKAKELS NA VERSKEIE OPENBARE MEDIA KANALE. U KAN ‘N MEDEWERKER IN CHRISTUS WORD DEUR STUDIEGIDSE WAT VIR U TOT SEËN WAS, AAN ANDERE DEUR TE GEE.